TIKVAH AFAAN OROMOO

​"Manaa ba'uu hin dandeenye" - Jiraattota mooyyaale

​Moyyaaleetti maaltu mudate?

​Magaalaa daangaa Itoophiyaa fi Keeniyaa kan taate Moyyaaleetti tibbana haalli nageenyaa gaarii miti.

​Keessattuu dilbata waaree booda sa'aatii 5:30 jalqabee naannawa gara garaatti dhukaasni ka'uusaa jiraattonni naannichaa Tikvaah Itoophiyaatti himaniiru.

​Jiraattonni akka jedhanitti; "Magaalaa Moyyaalee kan daandiidhaan qofa naannoon Oromiyaa fi Somaalee itti wal-daangessan keessatti bakka falmiin daangaa jirutti alaabaan naannoo Somaalee dhaabbateen walqabateeti walitti bu'iinsi ka'e," jedhaniiru.

​Dilbata darbe Onkoloolessa 08, 2019 (A.L.H) walitti bu'iinsa ka'een shamarreen umurii waggaa 13 tokko ajjeefamuu hordofee tajaajilli geejjibaa, daldalaa fi buufata konkolaataa addaan citee akka ture ibsaniiru.

​"Walitti bu'iinsa kana hordofee dilbata irraa jalqabee hanga kaleessaatti jaarsoliin biyyaa fi hoggantoonni nageenyaa alaabaan sun akka bu'u irratti waliigalteerra gahuu isaanii" kan dubbatan jiraattonni, "murtiin kun keessattuu jiraattota Somaalee ganda 02 jiraatan biratti mormii kaaseera," jedhaniiru.

​Guyyoota lamaan darban waraana guddaan turuu fi kaleessa galgala sa'aatii 5:30 jalqabee naannoowwan gara garaatti dhukaasni jalqabamuusaa jiraattonni Tikvaah Itoophiyaatti himaniiru.

​"Guyyoota lamaan dabran humnoonni nageenyaa Feedeeraalaa seenuudhaan dhukaasa dhaabaniis, dhukaasni kaleessa galgala ka'e sababiin isaa kanneen armaan olitti eeraman ta'us, naannowwan biroo kan naannolleen lamaan Moyyaalee fi naannowwaan ishee itti wal-daangessan biroottis jalqabamuun isaa haala sana caalaatti hammeessuu danda'a," jechuun sodaa isaanii ibsaniiru.

​Jiraattonni yaada isaanii yeroo kennanitti dhukaasa guddaa fi sodaa guddaa keessa waan jiraniif manaa ba'uu akka hin dandeenye Tikvaah Itoophiyaaf ibsaniiru.

​Tikvaah Itoophiyaan odeeffannoo dabalataaf itti gaafatamtoota nageenyaa Moyyaalee gama naannolee lamaaniinuu jiran irraa argachuudhaaf ganama irraa jalqabee bilbilaa turus, irra deddeebii bilbilus deebii argachuu hin dandeenye.

#TikvahAfaanOromoo
Onkololeessa 11, 2019
Finfinnee

@tikvahethafaanoromoo

#Yakka

Himatamaan Yakka ajjeechaa sukkaneessaa raawwate adabbii hidhaa cimaan adabame.

Godina kibba baha Oromiyaa,Bulchiinsa Magaalaa Asallaatti himatamaan,yakka ajjeechaa sukkaneessa raawwate, adabbii hidhaa cimaa umurii gutuun adabame.

Yakkamaan maqaan isaa Ahimaddiin Abdallaa Badhaanee jedhamu yakka raawwachuuf itti yaadee gaafa guyyaa 19/4/2018 galgala keessaa tilmaaman toora sa’aatii 1:30 yommuu tahu, Godina Kibba Bahaa Oromiyaa, bulchiinsa magaalaa Asallaa ganda Haliilaa iddoo addaa Haroo Aarduu jedhamu keessatti miidhamtuu dhuunfaa Samiiraa(Gishuu) Manzaa Galatoo jedhamtu yakka ajjechaa sukkaneessaa irratti raawwate.

Sababni yakka ajjechaa kanaas sababa inaaffaa jaalalaa irraa ka’uudhan,ta'e jedhee itti yaaduun,iddoo hojii dhuunfaa isheen hojjettuu,bilbilaan waamudhaan iddoo bashannanaa Haroo Aarduu geessudhan,hanga saa'atiin yakki kun raawwatamuufi dukkanaa'utti eegudhaanis, iddoo sana tursiisuun,erga dukkanaa'ee booda,ka'i sin gaggeessaa ittiin jechuunis,akka namni ishee deeggaru hin jirre mirkaneeffachuun iddoo dukkanaa geessuun akka nama gaggeessetti erga isheen irraa siqxee duubaan uleen saggoo ykn morma ishee rukutuun lafatti kuffisee biraa deemees,gara iddoo hojii isaatti deebi'uudhan albee fudhatees bakka isheen kuftee jirtutti itti deebi'uudhan,akka isheen hin duune mirkaneeffachuun,hammeenya ykn gara jabinan morma ishee akka horiitti qaluudhan kuntaala midhaan itti naqamu keessatti galchee akka namni hin argineef jechas Haroo Aarduu keessatti gatee biraa deeme.

Yakka raawwatame kana bu'uura godhachuudhan,qorataan poolisiifi Abbaan Alangaa waliin ta'uun himannaa mana murtii Ol’aanaa godina kibba baha Oromiyaatti dhiyeessuudhan,manni murtichaas ragaa bitaa mirgaa ilaaludhan,dhaddacha gaafa guyyaa 6 / 2/ 2019 oleen,yakka gara jabummaadhan guuttame waan ta'eef, ragaa bitaafi mirgaa ilaaludhaan abbootiin murtii,murtii hidhaa cimaa keewwata seera yakkaa 539/1A tin hidhaa umuri guutuu isaafi fakkaattota isaa ni barsiisa jechuudhan murteessanii jiru.

Hirmaattonniifi maatiin miidhamtuus oolmaa dhaddachaa irratti argaman murtiin kenname barsiisaa ta'uu dubbachuu isaani kominikeeshinii Poolisii magaalaa Asallaatu gabaase.

#TikvahAfaanOromoo
Onkololeessa 8, 2019
Finfinnee

@tikvahethafaanoromoo

Obbo Taarikuu Damisee eeggataa Hojii Raawwachiisaa Ol'aanaa Itiyoi Telekoom ta'uudhaan ramadamaniiru.

​Obbo Taarikuun Onkololeessa 06, 2019 ALH (A.L.A Onkololeessa 16, 2026) irraa eegalee Itiyoo Telekoom keessatti eeggataa Hojii Raawwachiisaa Ol'aanaa ta'uudhaan akka hooggananiif ramadamuu isaanii Boordiin Daayirektaroota Itiyoo Telekoomiif beeksiseera.

​Dhaabbata kana keessatti Obboo Taarikuu Damisee hoogganoota fi hojjettoota dhaabbatichaa akkasumas qooda fudhattoota dhimmi ilaallatu waliin ta'uudhaan karoorri tarsiimoo kun haala bu'a qabeessa ta'een hojiirra akka oolu, sochiiwwan hojii guyyaa guyyaa hordoffii fi to'annoo hoogganummaa sirrii ta'een akka hoogganan, qulqullinni tajaajilaa fi hojii akka fooyya'u akkasumas guddinni yeroo dheeraa fi dorgomtummaan dhaabbatichaa akka cimu itti gaafatamummaan kan kennameef ta'uu ibsameera.

​Kanaan dura Itiyoo Telekoom Hojii Raawwachiisaa Ol'aanaa ta'uudhaan kan hogganaa turan Fireehiwot Taammiruu Fuulbaana 28/2019 ALH irraa eegalee Ministira Innooveeshinii fi Teeknoolojii ta'uudhaan Muummee Ministiraa Doktor Abiy Ahmediin muudamun isaanii ni beekama.

​#TikvahAfaanOromoo
Onkololeessa 6, 2019
Finfinnee

@tikvahethafaanoromoo

Baankiin Hojii Gamtaa Oromiyaa gabaasa hojii bara 2025/26 irratti milkaa'ina gurguddaa galmeessuu beeksiseera.

​Faayinaansii fi Guddina Baankichaa

➻​Qabeenya Waliigalaa: Birrii biiliyoona 224.09 gahuu danda'eera.
➻​Kuusaa Maamiltootaa: Birrii biiliyoona 193.26 gahaera.

➻​Liqii Kenname: Maamiltootaaf Birrii biiliyoona 142 liqeeffameera.

➻​Bu'aa Gibira Duraa: Birrii biiliyoona 8.11 galmeessiseera.

​Tajaajila Dijitaalaa fi 'Coopay E-Birr'

​Baankichi tajaajila dijitaalaa ammayyeessuu fi babal’isuu irratti invastimantii guddaa taasisera:

➻​Fayyadamtoota Coopay E-Birr: Biiliyoona 22.3 ol.

➻​Daldaltoota Fayyadaman: Kuma 368.7 ol.

➻​Bakka Bu'oota (Agents): Kuma 42.8 ol.

​Qabeenya Namaa (Hojjettoota)

➻​Hojjettoota Dhaabbataa: 7,108
➻​Hojjettoota Kontraataa/Alaa: 6,221
➻​Humna Hojii Waliigalaa: 13,329

​Hojii Gaggeessaan Olaanaa Baankichaa Obbo Daribee Aswaafu akka ibsanitti:
​Dorgommii, jijjiirama teeknooloojii fi haala diinagdee addunyaa ulfaataa keessattis baankichi milkaa'ina kana galmeessuu danda'eera.

​Gara fuulduraatti tajaajila dijitaalaa cimsuu, daldaltoota xixiqqaa fi giddugaleessaa deeggaruu fi guddina diinagdee Itoophiyaa keessatti gahee guddaa taphachuuf xiyyeeffannoon ni hojjetama.

#TikvahAfaanOromoo
Onkololeessa 6, 2019
Finfinnee

@tikvahethafaanoromoo

Itoophiyaa keessatti fayyadamtoota intarnetaa 100 keessaa 55 araada olaanaaf saaxilamuu isaanii ibsame!

​Itoophiyaa keessatti lakkoofsi lammiilee bilbila isaaniitiin meeshaalee qunnamtii hawaasaa kanneen akka Feesbuukii, Tik Tok fi Telegram fayyadamanii dabalaa kan jiru ta’us, irra caalaan isaanii araada garmalee fi miidhaa sammuuf (xiinsammuuf) saaxilamaa jiraachuu isaanii Dhaabbanni Qorannoo Poolisii (Policy Studies Institute) waltajjii gabaasa qorannoo haaraa dhiheesseen beeksiseera.

​Dhaabbatichi qorannoo taasiseen, fayyadamtoota intarnetaa 100 keessaa 55 kan ta'an bilbila isaaniifi meeshaalee qunnamtii hawaasaa osoo hin ilaalin ooluu kan hin dandeenye araada ulfaataa keessa galuu isaanii ibseera. Namni irra caalaan meeshaalee qunnamtii hawaasaa kan fayyadamu qophii sammuu fi xiinsammuu osoo hin taasisin waan ta'eef, barmaatilee badaa akkasitiif salphaatti akka saaxilamu sababa ta'uusaa ibsameera.

​Araada meeshaalee qunnamtii hawaasaa fi fayyadama sirrii hin taaneen walqabatee balaan hawaasa irra gahu olaanaa ta’uun caqasameera. Fayyadamtoota 100 keessaa 35 kan ta'an dubbii jibbiinsaa kan isaan gahu ta'uu, akkuma kanaan 28% kan ta'an immoo odeeffannoowwan walitti bu'iinsa saboomaa fi amantaa kakaasan kan isaan gahu ta'uu ibsameera.

​Geggeessitoonni biyyaa fi hawaasaa gochaalee daawwatan keessaa 71% kan ta'an qabiyyee jibbisiisaa fi arrabsoo kan qaban ta'uun qorannichaan agarsiifameera.

Meeshaalee qunnamtii hawaasaa waa'ee gaariif fayyadamuuf sababa ijoo gufuu ta'an keessaa madaalliin intarnetaa qaala’uun isa tokko ta’uun ibsameera.

​Fayyadamtoota 100 keessaa 67 gatiin intarnetaa qaala’uun gufuu kan ta'eef ta'uu, hanqinni bilbilaa fi kompiyuutaraa 38%, akkasumas hanqinni beekumsa diijitaalaa 38% namoota kan qoru ta'uu bal'inaan ibsameera.

​#TikvahAfaanOromoo
Onkololeessa 5, 2019
Finfinnee

@tikvahethafaanoromoo

Haala Yeroo Naannoo Tigraay !!

​Bulchiinsa Yeroo fi Qajeelcha Komaand Postii: Naannoon Tigraay ji'oota 6 dhufaniif komaand postii federaalaa jalatti kan turtu ta'a. Kaayyoon isaas nageenya kabachiisuu, bayyanannaa fi haaromsa Qabeenyaaf, akkasumas naannicha bulchiinsaaf mijataa gochuudha.

​Waamicha Qophii Filannoo: Turtiin komaand postii ji'a 6 kun yeroo xumuramu, Boordii Filannoo Biyyaaleessaa Itoophiyaatiin filannoon naannoo kan geggeffamu ta'a. Paartileen siyaasaas qophii akka taasisan waamichi dhihaateera.

​To'annoo Nageenyaa fi Magaalota: Raayyaan ittisaa Biyyaaleessaa fi Humni Nageenyaa Tigraay magaalaa Addigraat to'achuu hordofee, guyyoota dhufanitti Magaalota Aksum fi Adwaa to'annoo jalatti galchuuf hojjechaa jiru.

​Buqqa'oota fi Miseensota TPLF: kanneen buqqa'an gara qe'ee dhaloota isaanitti kan deebi'an ta'a. Miseensonni TPLF yakka irratti hin hirmaatinis hojii deebisanii dhaabuu naannichaa irratti hirmaachuu ni danda'u.

​Yaada Obbo Geetaachoo Raddaa: Obbo Geetaachoo Raddaa waraanni xumuramuusaa fi TPLF deebi'ee kan hin dhufne ta'uu ibsuun, hoggantoonni TPLF daangaa Eertiraa irraa gara kibbaatti naannoo laga Mareb akka jiran eeraniiru.

​Deebii TPLF: Gama biraatiin, hoggantoota TPLF kan ta'an Amaanu'el Asaffaa fi Komunikeshiniin dhaabbatichaa, "Lola deebisanii saaquuf qophiidha, humni kamiyyuu Tigraay hin bahu" jechuun yaada isaanii ibsataniiru.

#TikvahAfaanOromoo
Onkololeessa 1, 2019
Finfinnee

@tikvahethafaanoromoo

#MOE #Tigraay

Magaalaa Finfinneetti gurgurtoota konkolaataa 200 ol irratti tarkaanfiin fudhatame.

​Waajjirri Galiiwwan Magaalaa Finfinnee hordoffii torban lamaaf taasiseen, Wajjiraawwan taaksii dhoksuu irratti hirmaatan, ejentoota konkolaataa 200 ol irratti tarkaanfii bulchiinsaa fudhateera.

​Seer-maleessummaa gurguddoo deebisaman:

​Galchitoonni (importers) bakka gurgurtaa mataa isaaniitiin gurguruu mannaa, eenyummaa isaanii dhoksuudhaan ejentoota komishiniitiin gurguruu isaanii.

​Ejentoonni eeyyama daldalaa naannoleetti baafatanii Finfinnee keessatti konkolaatota gurguraa argamuu isaanii.

​Gurgurtoonni konkolaataa moofaa konkolaatota haaraa gurguruu isaanii.

​Qajeelfamoota fi waliigalteewwan haaraa hojiirra oolan:

Rakkicha mariidhaan furuudhaaf waajjirichi gurgurtoota konkolaataa moofaa waliin qabxiiwwan sadii irratti waliigaltee irra gaheera:

​Konkolaataa haaraa nama alaa galchu irraa fuudhanii gurguruu dhiisuu.

​Tarreeffama odeeffannoo konkolaataa gurguratanii guyyoota 10 keessatti waajjira galiiwwaniitiif beeksisuu.

​Konkolaataa moofaa dabalataa gara bakka gurgurtaatti erga galchaniin booda sa'aatii 24 keessatti gabaasa gochuu.

​Itti dabaluudhaanis, namoota konkolaatota mana jireenyaa fi man-kuusaa (magaazina) keessatti dhoksan irratti hordoffiin cimaan taasifamaa jira.

#TikvahAfaanOromoo
Hagayyaa 28, 2018
Finfinnee